PY-News ថ្ងៃទី 20 ខែ ឧសភា ឆ្នាំ 2022 

កណ្ដាល៖ ក្រុមហ៊ុនចំការចេកឈ្មោះ ហ័ងអាញ់ វៀតណាម បានស្តុបទឹកទុកមិនប្រយ័ត្នបណ្ដាលឲ្យបាក់ទំនប់ជន់លិចផ្ទះប្រជាពលរដ្ឋជាង១០០ខ្នងផ្ទះ កាលពីវេលាម៉ោង៤ល្ងាចថ្ងៃទី១៨ ខែឧសភា ឆ្នាំ២០២២ ស្ថិតក្នុងឃុំស្រែអង្គ្រង ស្រុកកូនមុំ ខេត្តរតនគិរី។

 

បើយោងតាមប្រភពព័ត៌មានពីប្រជាពលរដ្ឋដែលជាអ្នកលេងបណ្ដាញសង្គមហ្វេសប៊ុកបានឲ្យដឹងថា នៅវេលាម៉ោង៤ល្ងាចថ្ងៃទី១៨ ខែឧសភា ឆ្នាំ២០២២ នៅក្នុងទឹកដីក្រុមហ៊ុនហ័ងអាញ់ វៀតណាម ស្ថិតក្នុងឃុំស្រែអង្គ្រង ស្រុកកូនមុំ ខេត្តរតនគិរី ពិតជាមានហេតុការណ៍ទឹកជន់លិចជម្រករស់នៅរបស់ប្រជាពលរដ្ឋយ៉ាងពិតប្រាកដ។ ប៉ុន្តែសម្រាប់ឃុំ ស្រុក ខេត្ត ស្ងាត់ព័ត៌មានដូចចោរលួចសេះ។

 

នេះបើតាមលោក សេក ហៃ អភិបាលក្រុងបានលុងបានប្រាប់ដល់សារព័ត៌មានឲ្យដឹងថា នៅព្រឹកថ្ងៃទី២០ ខែឧសភា ឆ្នាំ២០២២នេះថា ពិតជាមានករណីទឹកជន់លិចផ្ទះបងប្អូនប្រជាពលរដ្ឋប្រាកដមែន ប៉ុន្តែទឹកជំនន់ដែលធ្វើឲ្យលិចផ្ទះរបស់បងប្អូនប្រជាពលរដ្ឋ មិនមែនដូចទឹកជំនន់ជន់លិចរៀងរាល់ឆ្នាំនោះទេ វាគ្រាន់តែជាការបាក់ទំនប់របស់ក្រុមហ៊ុនចំការចេកដោយសារក្រុមហ៊ុនបានស្តុបទឹកទុក ប៉ុន្តែដោយសារមេឃមានភ្លៀងខ្លាំងប៉ុន្មានថ្ងៃនេះ ទើបទឹកបុកបាក់ទំនប់ ជាហេតុធ្វើឲ្យទឹកហូរគ្របមកលិចផ្ទះសម្បែងរបស់ប្រជាជន។

 

ជាមួយគ្នានោះលោកអភិបាលក្រុងបានលុងបន្តថា ត្រឹមតែ២ម៉ោងប៉ុណ្ណោះទឹកក៏ស្រកទៅវិញអស់ ហើយប្រជាពលរដ្ឋអត់មានប៉ះពាល់អ្វីនោះទេ ព្រោះអាជ្ញាធរស្រុក ឃុំ ជាមួយកម្លាំងប្រដាប់អាវុធបានចុះអន្តរាគមន៍ជួយបងប្អូនប្រជាពលរដ្ឋទាន់ពេល មិនឲ្យប៉ះពាល់ដល់អាយុជីវិតរបស់ពួកគាត់នោះទេ គ្រាន់តែខួចខាតផ្ទះសម្បែងជាង១០០ផ្ទះ និងសម្ភារៈមួយចំនួនប៉ុណ្ណោះ។

 

លោក សេក ហៃ បានបន្ថែមទៀតថា ជុំវិញករណីនេះ លោកនឹងឲ្យជំនាញធ្វើការស្រង់ស្ថិតិឲ្យបានជាក់លាក់ និងស្នើសុំទៅខាងកាកបាទក្រហមជួយជាជំនួយដល់ពួកគាត់ និងពិភាក្សាជាមួយក្រុមហ៊ុនដើម្បីឲ្យក្រុមហ៊ុនជួយពួកគាត់រកទីទួលមានសុវត្ថិភាពដើម្បីសាងសង់លំនៅដ្ឋានជូនពួកគាត់៕