កន្លងមកគេនៅចាំបានថាលោកញ៉ែម សំអឿនអភិបាលនៃគណៈអភិបាលខេត្តរតនគិរីធ្វើការក្រើនរំលឹកដល់អ្នកសារព័ត៌មានមួយចំនួនឱ្យអនុវត្តនិងផ្សព្វផ្សាយនូវអ្វីជាលក្ខណៈពិតប្រាកដនិងមិនក្លែងក្លាយនៅព័ត៌មានឲ្យបានគ្រប់ជ្រុងជ្រោយ តែពេលនេះយើងសូមលើកយកនូវព័ត៌មានមួយដែលកំពុងតែធ្វើសកម្មភាពដឹកជញ្ជូនអនុផលព្រៃឈើនៅក្នុងខេត្តរតនគិរីនេះតែម្ដង ពីសំណាក់ក្រុមឈ្មួញល្បីឈ្មោះ មករា និង​ឈ្មោះ ងួន វណ្ណា អតីតប្រធានវរៈការពារព្រំដែនលេខ៦២៣ ជូនលោកអភិបាលខេត្តរតនគិរីឲ្យបានជ្រាបជាព័ត៌មាន។

 

    យោងតាមប្រភពព័ត៌មានបានឲ្យដឹងថាក្រុមឈ្មួញរកស៊ីកាប់បំផ្លាញព្រៃឈើឈ្មោះ មករា និងឈ្មោះងួន វណ្ណា ហៅអូនធំកំពុងតែចាប់ផ្ដើមដឹកជញ្ជូនអនុផលព្រៃឈើដែលប្រមូលបាននៅក្នុងស្រុកវ៉ឺនសៃបន្តដំណើរដឹកចេញទៅតាមច្រកទ្វេភាគីព្រំដែនអន្តរជាតិអូរយ៉ាដាវខេត្តរតនគិរី បានយ៉ាងរលូនដោយពុំមានសមត្ថកិច្ចជំនាញណាម្នាក់ហ៊ានបង្ក្រាបនោះទេ។

 

    ប្រភពព័ត៌មានបានបន្តទៀតថាក្រុមឈ្មួញរកស៊ីឈើខុសច្បាប់ឈ្មោះមករាកំពុងតែសម្រុកដឹកជញ្ជូនឈើឆ្លងដែនទៅស្រុកយួនបន្ទាប់ពីមានការស្ងប់ស្ងាត់មួយរយៈក្រោយមកតែបច្ចុប្បន្ននេះគឺចាប់ផ្ដើមងើបឡើងវិញហើយនិងធ្វើសកម្មភាពដោយដឹកជញ្ជូនអនុផលព្រៃឈើតាមប្រភេទរថយន្តសាំយ៉ុងហើយធ្វើដំណើរតាមច្រកព្រំដែនអន្តរជាតិអូរយ៉ាដាវដែលហាក់ដូចជាផ្ទុយទៅនឹងការលើកឡើងរបស់លោកញ៉ែម សំអឿន អភិបាលខេត្តរតនគិរី ដែលបានប្ដេជ្ញាកន្លងមកថានឹងបង្ក្រាបឲ្យអស់នូវបទល្មើសដែលកើតឡើងនៅទឹកដីខេត្តរតនគិរី។

 

    មជ្ឈដ្ឋានទូទៅបានលើកឡើងថាព្រៃឈើជាធនធានធម្មជាតិនៅក្នុងដែនអភិរក្សរបស់របស់រដ្ឋថាភិបាលបែរជាត្រូវរងការកាប់បំផ្លាញពីសំណាក់ក្រុមឈ្មួញធ្វើសកម្មភាពដោយគ្មានការទប់ស្កាត់បែបអាណាធិបតេយ្យពីសំណាក់មេឈ្មួញឈ្មោះ មករា និងឈ្មោះងួន វណ្ណាអតីតប្រធានវរៈការពារព្រំដែនលេខ ៦២៣ ដែលជាមេខ្លោងកំពុងធ្វើសកម្មភាពយ៉ាងសកម្មនៅក្នុងទឹកដីខេត្ដរតនគិរីតែម្ដង ។

 

    សូមបញ្ជាក់ផងដែរថាក្រុមឈ្មួញដែលកំពុងធ្វើសកម្មភាពដឹកជញ្ជូនអនុផលព្រៃឈើចេញពីស្រុកវិនសៃនឹងធ្វើចរាចរណ៍តាមរថយន្តសាំយ៉ុងឆ្ពោះទៅស្រុកយួននៅតាមច្រកព្រំដែនអន្តរជាតិអូរយ៉ាដាវជាហូរហែតែម្ដងមិនតែប៉ុណ្ណោះគឺគ្មានការត្រួតពិនិត្យទប់ស្កាត់ពីសំណាក់លោកវរសេនីយ៍ទោខឹម ចិត្រានាយប៉ុស្តិ៍នគរបាលអន្តោប្រវេសន៍ប្រចាំច្រកទ្វារព្រំដែនអន្តរជាតិអូរយ៉ាដាវនោះទេ ទើបគេដាក់ការសង្ស័យថាជាការបើកដៃនិងឃុបឃិតគ្នាជាប្រព័ន្ធជាមួយមន្ត្រីដែលពាក់ព័ន្ធធ្វើឲ្យសកម្មភាពដឹកជញ្ជូនឈើចេញទៅស្រុកយួនបានដោយរលូនបែបនេះ។

 

      ដូចនេះមហាជនបានលើកឡើងជាសំណូមពរដល់ឯកឧត្តមនាយឧត្តមសេនីយ៍សៅសុខាដែលទទួលបន្ទុកការពារធនធានធម្មជាតិក៏ដូចជាលោកញ៉ែមសំអឿនអភិបាលនៃគណៈអភិបាលខេត្តរតនគិរីមេត្តាមានចំណាត់ការបង្ក្រាបចំពោះមេឈ្មួញឈ្មោះមករានិងឈ្មោះងួន វណ្ណាហៅអូនធំឲ្យបានទាន់ពេលវេលាផងកុំឲ្យដូចមាត់ចាបមាត់ព្រាបលើកឡើងថាទន្សោងគោព្រៃតូចស៊ីតាមតូចធំស៊ីតាមធំ៕