ថ្ងៃចេញផ្សាយៈ18/05 /2025

ដោយ៖​PY-News​

ឯកឧត្តម វ៉ី សំណាង ជួបសំណេះសំណាល និងពិសាអាហារសាមគ្គីជាមួយអ្នកសារព័ត៌មាន និងក្រុមផលិតមាតិកា​ នៅខេត្តតាកែវ​ជាង១០០នាក់

ខេត្តតាកែវ៖ នាល្ងាចថ្ងៃសៅរ៍ ៦ រោច ខែពិសាខ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី១៧ ខែឧសភា ឆ្នាំ២០២៥ ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវបានជួបសំណេះសំណាលនិងពិសារអាហារសាមគ្គីជាមួយអ្នកសារព័ត៌មាន កាសែត​ វិទ្យុ​ ទូរទស្សន៍​ និងក្រុមផលិតមាតិកា​ នៅខេត្តតាកែវ​ ជាង១០០នាក់ ដើម្បីអបអរសារទទិវាសេរីភាពសារព័ត៌មាន ហើយចូលរួមនិយាយថា ទេចំពោះព័ត៌មានក្លែងក្លាយ ស្ថិតនៅអាហារដ្ឋានតាឧត្តម។

ក្នុងជំនួបនេះ ឯកឧត្តមអភិបាលខេត្តបានកោតសរសើរចំពោះតួនាទីដ៏សំខាន់របស់អ្នកសារព័ត៌មានក្នុងការផ្សព្វផ្សាយព័ត៌មានពិត និងរួមចំណែកក្នុងការអភិវឌ្ឍន៍ខេត្ត។ ឯកឧត្តមអភិបាលខេត្តបានសង្កត់ធ្ងន់លើសារៈសំខាន់នៃក្រមសីលធម៌វិជ្ជាជីវៈ និងការទទួលខុសត្រូវខ្ពស់ក្នុងការបំពេញភារកិច្ច ជាពិសេសនៅក្នុងបរិបទនៃការរីកសាយភាយព័ត៌មានមិនពិតនាពេលបច្ចុប្បន្ន។

ជាមួយគ្នានេះ ឯកឧត្តម វ៉ី សំណាង បានផ្តាំផ្ញើដល់បងប្អូនអ្នកសារព័ត៌មានទាំងអស់ សូមបន្តខិតខំបំពេញភារកិច្ចរបស់ខ្លួនឱ្យបានល្អប្រសើរថែមទៀត ក្នុងការផ្តល់ព័ត៌មានពិត ត្រឹមត្រូវ និងទាន់ពេលវេលាជូនដល់សាធារណជន។ ជាពិសេស ឯកឧត្តមបានលើកទឹកចិត្តឱ្យអ្នកសារព័ត៌មានទាំងអស់គ្នាចូលរួមយ៉ាងសកម្មក្នុងការលុបបំបាត់ព័ត៌មានក្លែងក្លាយ និងនិយាយថា “ទេ!” ចំពោះព័ត៌មានដែលគ្មានមូលដ្ឋានច្បាស់លាស់ ដែលអាចបង្កឱ្យមានភាពច្របូកច្របល់ និងផលប៉ះពាល់ដល់សង្គម៕"