ចេញផ្សាយ​១៨/១២/២០២៤

​ដោយ៖​PY-News​

 

ខេត្តតាកែវ៖ លោកជំទាវ ពេជ ម៉ារ៉ែន ប្រធានសាលាដំបូងខេត្តតាកែវ ព្រមទាំងក្រុមការងារ នៅព្រឹកថ្ងៃអង្គារ៍ ទី១៧ ខែធ្នូ ឆ្នាំ២០២៤នេះ បានអញ្ជើញចុះសាកសួរសុខទុក្ខ និងនាំយកជាសម្ភារៈថ្នាំពេទ្យ ថវិកាមួយចំនួន ទៅចែកជូនដល់គ្រួសារខ្វះខាតមួយគ្រួសារ ឈ្មោះ មិត្ត ស្រីលក្ខណ៍ អាយុជាង ២០ ឆ្នាំ ប្តីឈ្មោះ ឈួន រ៉ា និងមានកូនក្នុងបន្ទុកចំនួន ០២នាក់ នៅភូមិបាក់កូដ ឃុំលាយបូរ ស្រុកត្រាំកក់ ដែលកំពុងមានជំងឺរ៉ាំរ៉ៃយូរឆ្នាំ សម្រាកនៅផ្ទះ ។ 

ក្នុងឱកាសចុះសួរសុខទុក្ខនេះដែរ លោកជំទាវប្រធានសាលាដំបូងខេត្ត បានសម្តែងនូវក្តីអាណិត្តអាសូរ និងដោយសារមានចិត្តមេត្តាករុណាជាខ្លាំងទៅដល់គ្រួសារក្មួយស្រីខាងលើ បន្ទាប់ពីសង្កេតឃើញពីទុក្ខលំបាករបស់ពួកគាត់ ហើយក្នុងនាមយើងខ្ញុំទាំងអស់គ្នាជាគ្រួសារអ្នកតាកែវតែមួយ យើងត្រូវរួមសុខរួមទុក្ខ និងនៅជាប់ជាមួយបងប្អូនប្រជាពលរដ្ឋ ។

លោកជំទាវប្រធានសាលាដំបូងខេត្ត បានផ្ដាំផ្ញើឱ្យប្អូនស្រីតែកំពុងតែមានជំងឺរ៉ាំរ៉ៃយូរឆ្នាំ ឱ្យថែសុខភាព រកថ្នាំសង្កូវ យកមកប្រើប្រាស់ឲ្យទាន់ពេលវេលានិងបានការមើលថែពីគ្រូពេទ្យ។ ក្នុងឱកាសនោះផងដែរ លោកជំទាវបាននាំយកថវិកាមួយចំនួនដើម្បីផ្ដល់ជូនគ្រួសារប្អូនស្រី ដែលកំពុងតែមានជំងឺដេកនៅលើកន្ទេលរ៉ាំរ៉ៃ ដើម្បីយកទៅទិញថ្នាំ និងរកពេទ្យព្យាបាលជំងឺរបស់ខ្លួន ឱ្យបានឆាប់ជាសះស្បើយឡើងវិញ ។

ចុងក្រោយលោកជំទាវ ក៏បានចែកជូនថវិកាស្គាល់ខ្លួនដល់បងប្អូនប្រជាពលរដ្ឋ ក្មេងចាស់ប្រុសស្រីដែលបានចូលរួម គ្រប់ៗគ្នាផងដែរ។

បន្ទាប់ពីទទួលបានការឧបត្ថម្ភថវិកាផ្ទាល់ខ្លួន និងការយកចិត្តទុកដាក់ពីលោកជំទាវ ពេជ ម៉ារ៉ែន ប្រធានសាលាដំបូងខេត្ត គ្រួសារប្អូនស្រីដែលមានជំងឺខាងលើនិងបងប្អូនប្រជាពលរដ្ឋនៅជុំវិញទីនោះ បានគោរពថ្លែងអំណរគុណយ៉ាងជ្រាលជ្រៅចំពោះលោកជំទាវ ដែលបានផ្ដល់ភាពកក់ក្តៅដល់ប្រជាពលរដ្ឋដែលកំពុងតែជួបទុក្ខលំបាកនៅក្នុងខេត្តតាកែវបន្តបន្ទាប់ ទីណាមានទុក្ខទីនោះមានវត្តមានរបស់លោកជំទាវ និងគោរពជូនពរលោកជំទាវមកជួបប្រទះព្រះពុទ្ធពរទាំងបួនប្រការ គឺអាយុ វណ្ណៈ សុខៈ ពលៈ កុំឃ្លៀឃ្លាតឡើយ។