13/12/2021

(កំពត) ទីតាំងល្បែងមាន់ជល់និងអាប៉ោងគ្រប់ប្រភេទដុះស្លែមួយកន្លែងសង្ស័យអាជ្ញាធរនិងសមត្ថកិច្ចជាអ្នកបើកភ្លើងខៀវ បានជាទីតំាងនេះបើកដំណើរការយ៉ាងរលូន ដែលស្ថិតនៅក្នុងភូមិម្លិចគល់ ឃុំព្រៃឃ្មុំ ស្រុកទឹកឈូ ខេត្តកំពត។

 

បើយោងតាមបងប្អូនប្រជាពលរដ្ឋដែលរស់នៅជុំវិញទីតាំងខាងលើបានផ្ដល់ដំណឹងមកអង្គភាពសារព័ត៌មានយើងឲ្យដឹងថាមានទីតាំងល្បែងប្រជល់មាន់និងអាប៉ោងដុះស្លែមួយកន្លែងដែលស្ថិតនៅក្នុងឃុំព្រៃឃ្មុំ ស្រុកទឹកឈូ ខេត្តកំពត។

 

ប្រជាពលរដ្ឋបន្តថាចំពោះទីតាំងល្បែងជល់មាន់និងអាប៉ោងដុះស្លែដ៏ធំមួយកន្លែងនេះមិនដែលឃើញមានសមត្ថកិច្ចនិងអាជ្ញាធរចុះមកធ្វើការហាមឃាត់ក៏ដូចជាធ្វើការបង្ក្រាបម្តងណាឡើយ សង្ស័យតែអាជ្ញាធរនិងសមត្ថកិច្ចត្រូវរ៉ូវជាមួយនឹងម្ចាស់ទីតាំងល្បែងស៊ីសងនេះហើយ។ មហាជនដាក់ការសង្ស័យចំៗ ថាប្រសិនបើគ្មានការបើកដៃនិងមើលការខុសត្រូវពីសមត្ថកិច្ចនៃអធិការរដ្ឋានស្រុកទឹកឈូនោះទេ គឺល្បែងស៊ីសងបែបខុសច្បាប់នេះមិនអាចកើតមាននៅលើដែនសមត្ថកិច្ចរបស់លោកអធិការស្រុកទឹកឈូបានឡើយ។

 

ប្រជាពលរដ្ឋសូមសំណូមពរដល់លោកឧត្តមសេនីយ៍ស្នងការនគរបាលខេត្តកំពត មេត្តាចាត់វិធានការបង្ក្រាបផងខ្លាចថ្ងៃមុខមានអំពើហិង្សាក្នុងគ្រួសារក៏ដូចជាចោលឆក់ ចោរប្លន់ ជាដើម ដែលជាហេតុធ្វើឲ្យប៉ះពាល់ដល់សន្តិសុខសង្គម​។​