ភ្នំពេញ៖ សមត្ថកិច្ចបានឃាត់ខ្លួនបុរសម្នាក់ជាកូនឈ្នួល ដែលបានចាប់ប្រពន្ធថៅកែរំលោភសេពសន្ថវៈបានសម្រេច កាលពីព្រឹកថ្ងៃទី២៧ ខែកក្កដា ឆ្នាំ២០២១ ត្រង់ចំណុចរោងទិញលក់អេតចាយមួយកន្លែង ផ្លូវទំនប់៧មករា ស្ថិតនៅភូមិសាក់សំពៅ សង្កាត់សាក់សំពៅ ខណ្ឌដង្កោ ។

ជនសង្ស័យមានឈ្មោះ ផាន់ ដារ៉ា ភេទប្រុស អាយុ២៩ឆ្នាំ មុខរបរទិញលក់អេតចាយ ស្នាក់នៅក្នុងរោងទិញលក់អេតចាយ ផ្លូវទំនប់៧មករា ស្ថិតនៅភូមិសាក់សំពៅ សង្កាត់សាក់សំពៅ ខណ្ឌដង្កោ រាជធានីភ្នំពេញ ជនសង្ស័យអវិជ្ជមានកូវីដ១៩ និងអវិជ្ជមានសារធាតុញៀន។

 

ចំណែកនារីរងគ្រោះឈ្មោះ ហ ម រ ភេទស្រី អាយុ២១ឆ្នាំ មុខរបរទិញលក់អេតចាយ ស្នាក់នៅរោងអេតចាយ ស្ថិតនៅភូមិសាក់សំពៅ សង្កាត់សាក់សំពៅ ខណ្ឌដង្កោ ។

 

បេីតាមការរៀបរាប់ពីនារីរងគ្រោះបានប្រាប់ឲ្យដឹងថា កាលពីថ្ងៃទី២៣ ខែកក្កដា ឆ្នាំ២០២១ វេលាម៉ោង២២និង០០នាទី នារីរងគ្រោះកំពុងអង្គុយក្នុងបន្ទប់នៅរោងទិញលក់អេតចាយ ស្ថិតនៅភូមិកេីតហេតុខាងលេី តែម្នាក់ឯង ដោយសារឈ្មោះ ហុង ជិន អាយុ២៩ឆ្នាំ ត្រូវជាប្តីរបស់នារីរងគ្រោះ បានចេញទៅទិញអ៊ីវ៉ាន់នៅខេត្តកោះកុង ។

 

ប្រភពព័ត៌មានបានបន្តទៀតថា ពេលនោះជនសង្ស័យដែលជាអ្នករកស៊ីទិញលក់អេតចាយជាមួយគ្នា ឃើញជនរងគ្រោះនៅតែម្នាក់ឯង ក៏បានដើរចូលក្នុងបន្ទប់របស់ជនរងគ្រោះ បើកទូទឹកកកយកទឹកផឹក រួចក៏បានដើរមកចាប់អោបថើបជនរងគ្រោះ ហើយធ្វើសកម្មភាពយកដៃម្ខាងចាប់ច្របាច់ដោះ និងដៃម្ខាងទៀត ស្ទាប់ប្រដាប់ភេទ និងបឺតមាត់ជនរងគ្រោះថែមទៀត ។

 

ហើយនារីរងគ្រោះក៏បានខាំអណ្តាតជនសង្ស័យ និងបានសុំអង្វរជនសង្ស័យ កុំឱ្យធ្វើបែបនេះ ព្រោះនារីរងគ្រោះមានប្តីមានកូនរួចហើយ តែជនសង្ស័យ នៅតែធ្វើសកម្មភាព និងបានប្រាប់ជនរងគ្រោះកុំឱ្យស្រែកប្រយ័ត្នខ្មាសគេ រួចនារីរងគ្រោះមិនបានស្រែកទេ ក៏ប្រឹងរើបម្រះ ហើយជនសង្ស័យក៏បានយកដៃម្ខាងចាប់ជើងស្តាំ របស់នារីរងគ្រោះ និងយកដៃម្ខាងសង្កត់ដៃរបស់ជនរងគ្រោះ ដោយសារនារីរងគ្រោះស្លៀករ៉ូបពុំមានស្លៀកលីអូ និងអាវទ្រនាប់ឡើយ រួចជនសង្ស័យ ក៏បានធ្វើសកម្មភាពរំលោភសេពសន្ថវៈ លើនារីរងគ្រោះបានសម្រេច១លើក ។

 

ហើយជនសង្ស័យ ក៏បានដើរចេញទៅវិញបាត់ រួចនារីរងគ្រោះក៏បានងើបទៅងូតទឹក និងចូលដេកធម្មតា ដោយមិនបានប្រាប់ប្តីឱ្យបានដឹងឡើយ ហើយក៏មិនបានមកដាក់ពាក្យបណ្តឹងនៅសមត្ថកិច្ចទេ ព្រោះខ្លាចមានការបែកបាក់គ្នា ជាមួយគ្រួសារ និងខ្លាចខ្មាសគេផង ។

 

រហូតដល់ថ្ងៃទី២៧ ខែកក្កដា ឆ្នាំ២០២១ ប្តីបានត្រឡប់មកដល់រោងទិញលក់អេតចាយខាងលើវិញ មានការសង្ស័យទៅលើជនរងគ្រោះ ក៏បានព្យាយាមសួរនាំទៅនារីរងគ្រោះ ហើយនារីរងគ្រោះ ក៏បានប្រាប់រឿងហេតុខាងលើ ឱ្យប្តីបានដឹង រួចប្ដីក៏បានទូរស័ព្ទរាយការណ៍ប្រាប់សមត្ថកិច្ចប៉ុស្តិ៍នគរបាលរដ្ឋបាលសាក់សំពៅ ឱ្យជួយអន្តរាគមន៍ ហើយឃាត់ខ្លួនជនសង្ស័យ យកមកធ្វើការសាកសួរ និងនារីរងគ្រោះ បានដាក់ពាក្យបណ្តឹង ទៅលើជនសង្ស័យ ដើម្បីឱ្យសមត្ថកិច្ចចាត់ការតាមផ្លូវច្បាប់៕