តាកែវ៖ ថ្លែងក្នុងកិច្ចប្រជុំត្រួតពិនិត្យការអនុវត្តតួនាទី ភារកិច្ច និងវឌ្ឍនភាពការងារកងរាជអាវុធហត្ថ ៩ខែ លើកទិសដៅការងារត្រីមាសទី៤ ឆ្នាំ២០២២ កាលពីពេលថ្មីៗនេះ មេបញ្ជាការកងរាជអាវុហត្ថខេត្តតាកែវថ្មី លោកឧត្តមសេនីយ៍ត្រី សេង មហា បានដាស់តឿនដល់ មេបញ្ជាការមូលដ្ឋានក្រុង ស្រុក ទាំង១០ និងមន្រ្តីកងរាជអាវុធហត្ថទាំងអស់ មិនត្រូវលាក់លៀមបទល្មើសដែលកើតមានឡើងនៅក្នុងមូលដ្ឋានរបស់ខ្លួននោះទេ ជាពិសេសបញ្ហាគ្រឿងញៀន ពោលត្រូវតែរាយការមកកាន់បញ្ជាការដ្ឋាន និងសមត្ថកិច្ចពាក់ព័ន្ធ ដើម្បីធ្វើយ៉ាងណាបង្រ្កាបបទល្មើសដែលកើតមានឡើងឲ្យខាងតែបាន។

 

លោកឧត្តមសេនីយ៍ត្រី មេបញ្ជាការ បានថ្លែងថា «មេបញ្ជាការកងរាជអាវុធហត្ថ មូលដ្ឋានក្រុងស្រុក និងមន្រ្តីទាំងអស់ មិនត្រូវលាក់លៀមបទល្មើស ឬរឿងដែលកើតឡើងក្នុងមូលដ្ឋានរបស់ខ្លួន ជាពិសេសបញ្ហាគ្រៀងញៀន ដោយខ្លាចមេស្ដីបន្ទោសនោះទេ គឺត្រូវតែរាយការណ៍រាល់បទល្មើសដែលកើតមានឡើង ហើយសហការបង្រ្កាបឱ្យខានតែបាន»។

 

ពាក់ព័ន្ធបញ្ហាគ្រឿងញៀន លោកឧត្តមសេនីយ៍ត្រី សេង មហា បានណែនាំដល់ មេបញ្ជាការមូលដ្ឋានក្រុង ស្រុក ទាំង១០ និងមន្រ្តីកងរាជអាវុធហត្ថទាំងអស់ នៅក្នុងខេត្តតាកែវ កុំឱ្យយកចិត្តទុកដាក់បញ្ហាគ្រឿងញៀននេះជាបញ្ហាស្នូល ដោយធ្វើយ៉ាងណាបង្រ្កាបការប្រើប្រាស់ ចែកចាយជួញដូរ និងផលិតកុំឲ្យកើតមាន ដែលមានការលើកឡើងច្រើនពីបញ្ហាគ្រឿងញៀននេះ ហើយចំពោះអ្នកពាក់ព័ន្ធបើជាសមត្ថកិច្ច មេបញ្ជាការមូលដ្ឋានក្រុង ស្រុក ត្រូវរាយការណ៍ផ្ទាល់មកកាន់មេបញ្ជាការ ដើម្បីសុំគោលការណ៍ទៅថ្នាក់ដឹកនាំ ចាប់ខ្លួនយកទៅផ្តន្ទាទោសឲ្យខាងតែបាន និងគ្មានការយោគយល់អ្វីទាំងអស់៕