នេះបើតាមការឲ្យដឹងពី ឯកឧត្តមបណ្ឌិត រស់ សុវាចា អគ្គលេខាធិការ និងជាអ្នកនាំពាក្យក្រសួងអប់រំ យុវជន និងកីឡា ក្នុងសន្និសីទសារព័ត៌មានរបស់អង្គភាពអ្នកនាំពាក្យរាជរដ្ឋាភិបាល នៅព្រឹកថ្ងៃទី១៦ ខែសីហា ឆ្នាំ២០២២ ក្រោមប្រធានបទ «សមិទ្ធផលរយៈពេល៥ឆ្នាំ របស់ក្រសួងអប់រំ យុវជន និងកីឡា»។

 

ឯកឧត្តមបណ្ឌិត រស់ សុវាចា បានអះអាងថា រហូតមកដល់ពេលនេះក្រសួងអប់រំ យុវជន និងកីឡា បានត្រៀមខ្លួនរួចរាល់ហើយ សម្រាប់រៀបចំដំណើរការប្រឡងដ៏សំខាន់ទាំងពីរនេះ។ លោកបន្ដទៀតថា សម្រាប់ការប្រឡងលទ្ធផលប្រឡងឌីប្លូម គ្រោងនឹងធ្វើនៅថ្ងៃទី៣១ ខែតុលា ឆ្នាំ២០២ ខណៈលទ្ធផលប្រឡងបាក់ឌុប គ្រោងនឹងធ្វើនៅថ្ងៃទី០៧ ខែធ្នូ ឆ្នាំ២០២២។

 

ជាមួយគ្នានេះ ឯកឧត្តមបណ្ឌិត រស់ សុវាចា អ្នកនាំពាក្យក្រសួងអប់រំ យុវជន និងកីឡា ក៏បានផ្ញើសារសំខាន់មួយចំនួនជូនដល់បេក្ខជនប្រឡងទាំងពីរប្រភេទ សូមឲ្យពួកគាត់បន្ដខិតខំប្រឹងប្រែងរៀនសូត្រទាំងនៅក្នុងថ្នាក់ និងរៀនខ្លួនឯងបន្ថែម ព្រមទាំងត្រង់ត្រាប់ស្ដាប់ឱវាទពីសំណាក់មាតា បិតា អាណាព្យាបាល។

 

ឯកឧត្តមបណ្ឌិត រស់ សវាចា បានគូសបញ្ជាក់ថា បន្ថែមពីការបន្ដរៀនត្រៀមប្រឡងសញ្ញាបត្រមធ្យមសិក្សាបឋមភូមិនិងសញ្ញាបត្រមធ្យមសិក្សាទុតិយ បេក្ខជនប្រឡងទាំងអស់ គឺត្រូវតែបន្ដអនុវត្តឲ្យបានខ្ជាប់ខ្ជួនជាទីបំផុត នូវគោលការណ៍នានារបស់ក្រសួងសុខាភិបាល ក៏ដូចជាគោលការណ៍របស់ក្រសួងអប់រំ យុវជន និងកីឡា និងគោរពច្បាប់ចរាចរណ៍ ជៀសវាងការប្រើប្រាស់ថ្នាំញៀនខុសច្បាប់ ឬបារីគ្រប់ប្រភេទ ដើម្បីរក្សាសុខភាព និងអាយុជីវិត ដើម្បីឈានជើងចូលរួមការប្រឡងនាពេលខាងមុខនេះ៕