តាកែវ៖ នៅព្រឹកទី០១ ខែកក្កដា ឆ្នាំ២០២១​នេះ លោកឧត្តម​សេនីយ៍ត្រី ឆឹង រតនៈ​ ស្នងការរងនគរបាលខេត្តតាកែវ ទទួលផែនការងារធនធានមនុស្ស និងជាអនុប្រធានគណៈកម្មាធិការមូលដ្ឋានសមាគមមិត្តនគរបាលជាតិកម្ពុជា តំណាងដ៏ខ្ពង់​ខ្ពស់ ឯកឧត្តម ឧត្តមសេនីយ៍ទោ សុខ សំណាង ស្នងការនៃស្នងការដ្ឋាននគរបាលខេត្តតាកែវ និងជាប្រធានគណៈកម្មា​ធិការមូលដ្ឋានសមាគមមិត្តនគរបាលជាតិកម្ពុជា ខេត្តតាកែវ បានអញ្ជើញប្រគល់ថវិកាសមាគមមិត្តនគរបាលជាតិកម្ពុជាចំនួន ៦.០០០.០០០៛( ប្រាំមួយលានរៀល)ជូនដល់លោកស្រី មួង ដានី ត្រូវជាភរិយា សព លោកអនុសេនីយ៍ឯក អោម ថា មន្រ្តីបម្រើការងារនៅ អធិការដ្ឋាននគរបាលស្រុកត្រាំកក់ នៃស្នងការដ្ឋាននគរបាលខេត្តតាកែវ ដែលបានទទួល​មរណៈភាពកាលពីថ្ងៃទី០៩ ខែមិថុនា ឆ្នាំ២០២១ ដោយជម្ងឺ​(រោគាពាធ) ស្ថិតនៅភូមិត្រពាំងរុន ឃុំឧត្ដមសូរិយា ស្រុកត្រាំកក់ ខេត្តតាកែវ។

 

ឆ្លៀតក្នុងឱកាសនោះដែរលោកឧត្តមសេនីយ៍ត្រី ស្នងការរង ឆឹង រតនៈ ក៏បានសំណេះសំណាលជាមួយក្រុមគ្រួសារសព និង​សំដែងនូវការអាឡោះអាល័យ សោកស្តាយពន់ពេក ជា​មួយ​គ្រួសារ​សព ចំពោះការបាត់បង់ស្វាមី និងឪពុកដ៏ល្អ​ ព្រម​ទាំងបានពាំនាំនូវប្រសាសន៍ផ្ដាំផ្ញើចូលរួមរំលែកទុក្ខ ពីសំណា​ក់សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងជាប្រធានកិត្តិយសសមាគមមិត្តនគរ​បាលជាតិកម្ពុជា ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងជាប្រធានគណៈកម្មាធិការកណ្ដាលសមាគមមិត្តនគរបាលជាតិកម្ពុជា និងឯកឧត្តម ឧត្តមសេនីយ៍ទោ ស្នងការនគរបាលខេត្ត និងជាប្រធានគណៈកម្មាធិការមូលដ្ឋានសមាគមមិត្តនគរបាលជាតិកម្ពុជា នៃស្នងការដ្ឋាននគរបាលខេត្តតាកែវ មកជម្រាបជូនគ្រួសារនៃសពផងដែរ។